موضوع: رد: لا امان ولا سلام مع النظام 04/02/11, 11:34 am
معظمنا الوقتى محتار ومش عارف يقف مع مين شويه بقول لازم يمشى وشويه اخاف لو مشى الوقتى الدنيا تتدهور زياده فى ظل وجودالمعارضه الكتير الى فى البلد اكيد هيتنافسوا على السلطه والدنيا هتتلخبط اكتر داهم اصلا بيتخانقو وهم موجود امال اما يمشى بقى بس فى النهايه الاهم ان الدنيا تهدى يرجع الامن والامان تانى انا حاسه اننا داخلين على ايام ما يعلم بيها الى الله
موضوع: رد: لا امان ولا سلام مع النظام 04/02/11, 04:31 pm
ان والله نفسى نوقف المظاهرات دى لحد انتهاء مدة الرئيس ونشوف بعدكدة مطالبنا اتحققت كلها ولا لسة ولو كدة يعملوا مظاهرات تانية وساعاتها هيكونوا معاهم حق انهم مش يوقفوا المظاهرات ابدا بس حاليا لازم نعطى فرصة للرئيس ومن معة علشان بعدولوا الدستور وينفزوا مطالبنا كلها بتمنى من كل قلبى المظاهرات دى تقف وربنا يستر على بلادنا لانى بجد انا خايفة جدا من الايام الى جاية
موضوع: رد: لا امان ولا سلام مع النظام 04/02/11, 10:38 pm
ياراجل ارحموا عزيز قوم ذل ده الكفار لما استسمحوا الرسول في فتح مكه سامحهم ده مش كافر ده حد نفذلنا كل مطالبنا لو بنا وبينهم دم خلاص المسؤلين بياخدوا جزاؤهم دلوقتي وماتقولش قاعدين هناك عشانا لو اتفرجت ع الحياه كنت عرفت عقليتهم متخلفه قد ايه ومش عندهم افكار غير اللي هما حافظينها انت فاكر ان لو الريس مشي هما هيمشوا هيفضلوا قاعدين لحد لما الدستور يتأسس من جديد طب ده كلام عاقل ياراجل بذمتك فين دماغك وعقلك ياحسام بالله عليك كفايه تسخين بقي
موضوع: رد: لا امان ولا سلام مع النظام 04/02/11, 10:57 pm
ياريتك كنت هناك دلوقتي عشان تشوف الناس هناك شكلها ايه وتفكيرها عامل ازاي الناس اللي انت بتقول عليهم قال ايه هناك عشانا انت لو عندك نية تروح كنت روحت وماتقولش بعيد لان دي مش حجه مقنعه انا اول مره احس اني خايفة منك اوي كده لان انت مش حسام اللي عقله كبير اللي عرفته من اول يوم دخلت فيه المنتدي
موضوع: رد: لا امان ولا سلام مع النظام 04/02/11, 11:15 pm
noor كتب:
معظمنا الوقتى محتار ومش عارف يقف مع مين شويه بقول لازم يمشى وشويه اخاف لو مشى الوقتى الدنيا تتدهور زياده فى ظل وجودالمعارضه الكتير الى فى البلد اكيد هيتنافسوا على السلطه والدنيا هتتلخبط اكتر داهم اصلا بيتخانقو وهم موجود امال اما يمشى بقى بس فى النهايه الاهم ان الدنيا تهدى يرجع الامن والامان تانى انا حاسه اننا داخلين على ايام ما يعلم بيها الى الله
انا كنت محتار زمان لكن دلوقتى لا مبارك ملوش مكان فى السلطه تانى بعد كل الى حصل لو الموضوع هدى وللاسف دا الى بيحصل بشويه خطابات بيضحكوا بيها على الناس هيلموا كل الناس دى وهيبهدلونا تانى الناس دى ملهاش امان ومفيش لهم ثقه
semsma كتب:
ان والله نفسى نوقف المظاهرات دى لحد انتهاء مدة الرئيس ونشوف بعدكدة مطالبنا اتحققت كلها ولا لسة ولو كدة يعملوا مظاهرات تانية وساعاتها هيكونوا معاهم حق انهم مش يوقفوا المظاهرات ابدا بس حاليا لازم نعطى فرصة للرئيس ومن معة علشان بعدولوا الدستور وينفزوا مطالبنا كلها بتمنى من كل قلبى المظاهرات دى تقف وربنا يستر على بلادنا لانى بجد انا خايفة جدا من الايام الى جاية
مفيش امان لخاين ومش هنحس بأمان مع قاتل زى دهالمظاهرات تخلص وكل حاجه تنتهى طب ودم الناس الى ماتواالاعداد اتقتلت فى الايام دى اكتر من الاعداد الى بتقتلها اسرائيل فى مجازرها
شجن كتب:
ياراجل ارحموا عزيز قوم ذل ده الكفار لما استسمحوا الرسول في فتح مكه سامحهم ده مش كافر ده حد نفذلنا كل مطالبنا لو بنا وبينهم دم خلاص المسؤلين بياخدوا جزاؤهم دلوقتي وماتقولش قاعدين هناك عشانا لو اتفرجت ع الحياه كنت عرفت عقليتهم متخلفه قد ايه ومش عندهم افكار غير اللي هما حافظينها انت فاكر ان لو الريس مشي هما هيمشوا هيفضلوا قاعدين لحد لما الدستور يتأسس من جديد طب ده كلام عاقل ياراجل بذمتك فين دماغك وعقلك ياحسام بالله عليك كفايه تسخين بقي
الحديث ده انا اول واحد اقوله لما سمعت كلامه المنافق الى ضحك بيه على مشاعر الناس الدم هيفضل موجود بينا وبينه هو مش مع مسؤلين صغيرين بيتقدموا للشعب ككبش فداء انا مش بخسن ومش عادتى ولا علشان قولت كلمه حق يبقى انا ارهابى وعميل وعاوز ادخل امريكطا البلد افكار فاسده ملى دماغكم بيها ان اى حد ضده ارهابى مش هقول غير حسبى الله ونعم الوكيل
شجن كتب:
ياريتك كنت هناك دلوقتي عشان تشوف الناس هناك شكلها ايه وتفكيرها عامل ازاي الناس اللي انت بتقول عليهم قال ايه هناك عشانا انت لو عندك نية تروح كنت روحت وماتقولش بعيد لان دي مش حجه مقنعه انا اول مره احس اني خايفة منك اوي كده لان انت مش حسام اللي عقله كبير اللي عرفته من اول يوم دخلت فيه المنتدي
انا من اول يوم وانا بقول كلمه حق مش بخاف فيها من حد بقول الى بحسه وبقتنع بيه انا فعلا كان نفسى اروح ومش بسخن حد ومش بقول كلام وخلاص وكلامك اكبر دليل انك مش عارفه بتكلمى مين انا تقريبا قاعد فى المنصوره يعنى مش ممكن هقدر اوصل هناك ولو قدرت اوصل القاهره مش ممكن هقدر اوصل للناس دى فى التحرير اقسم بالله انى لو من اهل القاهره مكنتش فارقت التحرير ابدا كمان لان المكان بعيد مقدرش اروح لانى هكون بعيد اوى عن البيت وانا راجل البيت الوحيد واهلى بيخافوا يكونوا لوحدهم من غيرى اما الناس الى هناك فانا عارفهم كويس كلهم كبار ومثقفين وعقلاء مصر بيطالبوا مطالب مشروعه لاى شعب فى العالم وهو بكل بجاحه متمسك بالكرسى الانسان الى عقله كبير هو الى مش بيخلى سياسات مريضه تضحك عليه ويكون فاهم هو بيقول ايه مش بيردد حوارات خادعه ومكشوفه وبيتخدع بيها
موضوع: رد: لا امان ولا سلام مع النظام 04/02/11, 11:20 pm
اقتباس :
شكرا ليكى يا نور مع احترامى ليكى لكن كاتب المقال ده حد جاهل بالنظام وبالدستور والقوانين صحيح هو كان اعلن قبل كده انه مش هيرشح نفسه بس ده كان فى عز شبابه انما دلوقتى حاجه تانيه مبارك طول عمره مغرور فى خطاباته ودى اول مره يكون مسكور قدام الشعب ويستحيل انه يرشح نفسه تانى اما بالنسبه للطعون فالمجلس منتظر الفصل فيها من قبل محكمه النقض وقالوا انهم هيفصلوا فى العضويات اول بأول بدون اى نتظار المجلس صحيح سيد قراره بشرط الا يتعدى بقراراته مصلحه الشعب والجاهل الى كاتب المقال ميعرفش انه لو تم حل مجلس الشعب مش هنقدر نغير الدستور وهتتعطل كل المصالح فى مصر ومش هنقدر نجرى انتخابات فى ظل الدستور القديم اما الماده الخاصه بالاشراف القضائى فىالدستور فلم يتم تعديلها لانه لم يتم تغيرها من الاساس الماده ثابته ولم يتم الغاء الاشراف القضائى على الانتخابات لكن الى حصل ان الاشراف زمان كان يفهم منه وجود قاضى على كل صندوق انتخابات وقامت المحكمه الدستوريه بسلطتها فى تفسير نصوص الدستور بتفسير النص على انه يعنى الاشراف العام فقط على اللجان بمعنى وجود قاضى على رأس اللجنه المشرفه فقط وبالنسبه للمخربين من الشرطه فدى مسؤليه حبيب العادلى وهو بالفعل معتقل حاليا وهيتم محاكمته محاكمه شعبيه الدستور والجيش مش بيضمنوا انتقال السلطه ولا حاجه بالعكس لو فرغ منصب الرئيس مش هيتولى الدوله رئيس المحكمه الدستوريه العليا لانه علشان يتولاها لازم يكون فى غياب النائب وغياب رئيس مجلس الشعب ولو تولى احد غير رئيس الدوله شئون الرئاسه هتكون مصيبه حاليا لان بنص الدستور انه يجب التقيد بالحظر المنصوص عليه فى الفقره الثانيه فى الماده 82 وتقول اختصارا انه لا يجوز لمن ينوب عن رئيس الدوله طلب تعديل الدستور او حل مجلسى الشعب والشورى او اقاله الحكومه
بمعنى انه لو ساب السلطه حال البلد هيقف والانتخابات هتكون بايظه فى ظل البرلمان القديم والدستور القديم ومصايب كتير
احنا حققنا اهدافنا ومطالب الشعب اتحققت وعاوزين ندى فرصه علشان نشوف النتيجه الطلبات التانيه دى مش طلبات الشعب دى مطالب ومصالح شخصيه لاناس حسبى الله ونعمى الوكيل فيهم عاوزين يدمروا البلد على فكره انا مش مؤيد لنظام مبارك وانا طول عمرى ضده واكيد كلكم عارفين بس انا بتكلم بصوت العقل
موضوع: رد: لا امان ولا سلام مع النظام 04/02/11, 11:33 pm
مش هرد على نفسى لان مفيش تناقض بين الكلام مع ان الكلام ده كنت قولته بعد خطابه الى كل الناس وانا منهم اتخدعوا بيه بسذاجه بعد كشف وجهه القبيج تانى يوم الصبح لما رجع يقتل فى الناس متبصيش للتلفزيون المصرى واتفرج على المقاطع الى بتحصل فى التحرير لسه امبارح بليل شايف سياره ماشيه بأقصى سرعه ليها وبتدخل فى المتظاهرين تخبطهم وبيطيروا فى الهواء زى الكوره لو الشخص ده فى ذره كرامه كان على الاقل نفذ البيان الى قولته قبل كده والى اجتمع عليه مثقفين مصر
ابن الاسلام كتب:
البيان اللى اجتمع عليه لجنه من حكماء مصر ودكاترة الجامعات ورجال اعمالها الغير مسيسين واللى بيحتوى على خمس نقط من المعتقد انه حل وسطى للأزمه
1- ان يكلف السيد مبارك الحكم للسيد عمر سليمان فى الفتر ه المتبقيه لولايته (6 شهور) ويكون تواجد...ه صورى وشرفى. 2- ان يتعهد عمر سليمان بحل حزبى الشعب والشورى ووزارة مبارك 3- ان يتعهد عمر سليمان بتشكيل... لجنه من قضاه مصر وحكمائها ورجال الدستور والحريات لتعديل كل نقط العيوب فى الدستور لصالح الديموقراطيه و الوطن 4- ان يتعهد بتشكيل وزاره تأسيسه من دكاتره الجامعات المعتدليين والمستقلين والشرفاء ويكونوا من العلماء بهدف اصلاح كل جوانب الحياه فى مصر التعليم الصحه العدل 5- ان يتعهد بانتهاء الفتره الاانتقالية ان يجرى انتخابات ديمقراطيه على رئاسه الجمهوريه ويتيح الفرصه لشرفاء مصر ان يخدموها واهم شى التعليم الامن الكرامة
لكن تمسكه بالكرسى وبالسلطه اكبر من اى حاجه واهم من دماء الناس الى ملت الشوارع والقصاص هيكون من ربنا ان شاء الله
موضوع: رد: لا امان ولا سلام مع النظام 04/02/11, 11:41 pm
برضو هتقولى الحكومة هى اللى عملت كده هو مش بالغباء ده انه عارف ان الشعب كله صدقه ومعاه وتانى يوم يغير الفكرة دى ويخلى ناس يروحوا يضربوا المتظاهرين ياابنى ماتشوف الناس الحقيقة الشباب بتوع 25 يناير بيقولوا ايه ع اللى بيحصل دلوقتى انت مش هتعرف الناس اللى هنالك اكتر منهم لانهم هما اللى كانوا موجودين والله برافو على الناس اللى بره واللى عرفت توقع الشعب فى بعضه وكلامك متناقض ياحسام ماتقولش مافيش تناقض منين بتقول ان ماينفعش حاجة تحصل من غير وجود الرئيس ومنين بتقول انه لازم يمشى انت قلت فى اول كلامك محتار اخاف على البلد
اقتباس :
اخاف على البلد والى فيها واكون ضد اكمال المظاهرات واننا ندى فرصه تانيه للنظام علشان نحافظ على بلدنا
خاف على بلدك هى اولى انك تخاف عليها مش عشان بنكره اشخاص نضيع البلد كلها وبرضو ماردتش لما الرئيس يمشى ايه اللى هيحصل بعد كده؟؟؟؟؟؟؟؟؟؟؟؟؟؟؟
موضوع: رد: لا امان ولا سلام مع النظام 04/02/11, 11:44 pm
ياريته كان مشى وساب البلد زى بتاع تونس وكانت خربت فوق دماغ اللى فيها عشان يعجب حضراتكم وبرضو كنتوا هتقولوا عليه هرب وسابها مشكلتك ان فكرة الانتقام مسيطرة على دماغك بشكل غريب فى حالة الغضب اوعى تفكر انك ممكن تاخد قرار سليم وفى الاخر عمال بنخرب فى بلدنا بايدينا والناس جعانة ومابقتش لاقية تاكل
موضوع: رد: لا امان ولا سلام مع النظام 04/02/11, 11:53 pm
الناس جعانه ومش معاها فلوس لان محدش قبض مرتبات ولا معاشات لان حضراتهم قافلين البنوك ودا بسبب بلطجيه الحكومه الى نازلين سرقه ونهب ولما حد بيتمسك بيعرفوا انهم شرطه لو كان خايف على مصر والمصريين وكان عاوز يحقن دمائهم كان استجاب للمطالب من الاول هو خايف انه لما يمشى هيتحاكم زى زين العابدين وعلشان انا خايف على بلدى وخايف على اهلها بقول ان مينفعش يكون موجود لانه هيبهدل الناس لو النظام استقر وهيلم كل الناس دى بالنسبه للسؤال فلو قرأتى البيان الى فوق هتعرفى انه ممكن يمشى ويكون موجود صوريا فى نفس الوقت والنظام هيفضل ماشى زى ما هو بس هيجرد من جميع صلاحياته وهيبقى زى ملكه بريطانيا صوره بس
موضوع: رد: لا امان ولا سلام مع النظام 05/02/11, 12:01 am
برضو بلطجية الحكومة لا حول ولا قوة الا بالله هيدمروا البلد بايديهم
ماتشوف اللى ميدان التحرير هناك دول مين وجنسياتهم ايه مش كتير على واحد كان هيبقى فى يوم من الايام احد شهداء اكتوبى انه يمشى متكرم من غير اهانة انت فاكر اساسا انهم هيمشوا لو الرئيس عمل كده لو كنت سمعت برنامج عمرو ادين على الحياة كنت هتعرف انهم هيفضلوا قاعدين حتى لو مشى وعايزين حضراتهم الدستور كله يتغير وهما برضو قاعدين انت ماشوفتش زيى قد ايه اللى اتكلموا ناس وقحة ومش فاهمة حاجة ومابحترموش حد يااخى دول بيقولوا على عمر سليمان انه خرب القضيى الفلسطينية وبينادوهم بعمر سليمان واحمد شفيق ولما قالولوهم عيب كده ردوا بمنتهى الوقاحة وبرضو لسه بتقولى هما هناك عشانا بذمتك انت عارف هما سقف مطالبهم ايه قولى حالا لو سمحت ده اذا كنت تعرف
موضوع: رد: لا امان ولا سلام مع النظام 05/02/11, 12:15 am
مطالب الناس العاقه هى المكتوبه فوق الناس الى بتقولى عليهم دول مش بعيد تكون الحكومه برده هى الى عملاهم علشان يعرفوا الناس ان دول شويه مخربين ودا الى بيحاولوا يقنعوا الناس بيه من البدايه عمرو اديب ده اكبر منافق فى مصر كلها انسان مش محترم وقليل الادب وعمرى ما اصدق حاجه يقولها ومش بتفرج اصلا على الكلام الفارغ ده الناس الى فى التحرير مطالبهم واضحه ومش محتاجه تفسير وكلهم ناس باينه انهم كويسه اعرف كتير منهم شيوخ وائمه وادباء وسياسين وحتى المتحدث بأسم الازهر نفسه وعلى فكره حتى المطالب الى فى البيان كتير عليه الشخص الى كان هيموت فى حرب اكتوبر ده قتل فى الكام يوم دول من اهله وشعبه اكتر من قتلهم فى حرب اكتوبر
{.... ÊfiÌ⁄ ابن الاسلام ....}
عدل سابقا من قبل ابن الاسلام في 04/01/12, 11:03 pm عدل 1 مرات
موضوع: رد: لا امان ولا سلام مع النظام 05/02/11, 12:27 am
المطالب اللى فوق بتمش الدستور النائب مالوش حق انه يحل مجلس الشعب او الشورى ثانيا على حد كلامك ده كلام العقلاء هما اساسا اللى فى الميدان مش عايزين كده دول بيقولوا عمر سليمان ده باع القضية الفلسطينية وكمان مش عاجبهم رئيس الوزراء يعنى مش عايزين لاحكومة ولا مجلس شعب عايزين يشكله لجنة من اللى الشباب الجميل اللى فى الميدان وهما اللى يقولوا يعدلوا ايه فى الدستور شوية عيال هتعمل الدستور برضو مش بتجاوبنى اجابة مقنعه هما اخرهم ايه يعنى عايزين ايه ايه اخر سقف مطالبهم الرئيس اللى مش عاجبك حارب فى 73 و67 وحمى شبابنا من حروب قبل كده عيب اوى ياحسام تقول عليه كده انت عملت ايه لمصر غير انك كنت قاعد بتشتم فيها قضى 30 سنة فى خدمة البلد ايوه كان فيه فساد وخلاص كل حاجة كانت هتبقى كويسة وقال سيبوا التاريخ يحكم ايه اللى ليا وايه اللى عليا مش كفاية كده ياحسام اهانة فيه
موضوع: رد: لا امان ولا سلام مع النظام 05/02/11, 12:37 am
كلامك بيعصبنى جدا لما تكونى عارفه ان انسان مجرم ويستحق محاكمه دوله على جرائم عملها فى شعبه عقوبتها دوليا الاعدام تقوليلى عمل كذا وكذا دا الراجل قتل شعبه قتله قتله انتى مش فاهمه يعنى ايه قتله مقتلش واحد ولا اتنين دا قتل مئات قد تصل الى الاف دا غير الى حصل فى بلدنا فى عهده الفاسد انا عاوزك تتخيلى ان حد من الناس الى ماتت دى يكون قريب منك صديق ولا قريب ولا ناس تعرفيهم انتى بتدافعى عن مجرم مفيش اى مبرر للدفاع عنه وبتسألى اسأله اتجاوب عليها قبل كده الناس الى فى الميدان مطالبهم متحققتش الى هى تغيير النظام وانسحاب مبارك منه المطالب الى بتقوليها ان اول مره اسمع عنها مع انى متابع من الاول لو جايبها عن طريق زفت الطين اديب يبقى مفيش داعى تسألى فيها تانى لانها مش حقيقه حتى لو سليمان وشفيق مش كويسين فالناس كلها عارفه انهم مرحله انتقاليه فقط لحين تغيير النظام الدستور والنقاش حوله مش بيغيره غير اساتذه القانون الدولى والدستورى والشباب الى فى التحرير ناس مثقفه وعارفين كده كويس ويستحيل ده يكون مطلبهم انا مش مع الهوجه ومش علشان معارضين يبقى بتفق معاهم انا بتفق مع الناس العاقله الى بتطلب مطالب مشروعه وتنفيذها جائز سقف مطالب الناس دى هو تغيير النظام بالطرق الى طلبوها ولو ده اتحقق المشاكل هتنتهى بس الظاهر انه مش هيحقق حاجه الا لما مليون كمان يتقتلوا
موضوع: رد: لا امان ولا سلام مع النظام 05/02/11, 12:47 am
اقسم بالله العظيم اقسم بالله العظيم اقسم بالله العظيم ان حتى لو الرئيس مشى هما مش هيمشوا من مكانهم ولا هيتحركوا خطوة واحدة انا ماقلتش عمرو اديب هو اللى قال الشباب نفسه هو اللى قال وجابوهم فى اكتر من قناة وعملوا معاهم حوارات وبرضو نفس الكلام انت اللى رافض اى حاجة توضح حقيقتهم اعرف سقف مطالبهم الاساسى واتناقش ياحسام لانك فعلا ماتعرفش هما عايزين ايه انا مابدافعش عن حد قد انى خايفة لو مشى مافيش حاجة من الاصلاحات تتحقق وهنرجع لنقة الصفر تاااااااااااانى اسمع كلام شباب 25 يناير تانى وانت تعرف ان الموجودين دلوقتى مش هما نفس الناس هتخسر ايه لما تصبر وتشوف الحكومة هتتصرف ازاى هو ميدان التحرير هيطير ماهو متلقح فى مكانه ابقوا ارجعوا تانى لو كانوا بيضحكوا عليكم
موضوع: رد: لا امان ولا سلام مع النظام 05/02/11, 12:59 am
الموجودين هناك انا شايفهم النهارده يمكن مش نفس الناس الى طلعت اول يوم بس كلهم ناس كويسه من ضمنهم الشيخ محمد حسان على الاقل ودا اكتر واحد انا عارفه مش عارف انا ليه بكرر كلام بس الظاهر انك مقرتهوش الشباب الى انتى بتقولى جايبنهم الله اعلم هما منين وبيقولوا كده ليه يمكن بيقولوا كده علشان الناس الى زيك يقولوا زى مانتى بتقولى انا قولت انى مش بتفق معاهم لو دى مطالبهم ووضحت انا مع مين انا بتناقش على اساس الناس الى عارفها ومش بتكلم وخلاص انا عارف هما عاوزين ايه انتى برده مجاوبتيش ان لو حد من اهلك كان اتقتل ومات وهو مضروب بالرصاص ولا مضروب بشوم ولا دخلت فيه عربيه قتلته كان موقفك هيبقى ايه النظام لو شد حيله واتصلح هيلم كل الناس الى خرجت وهيرميهم فى المعتقلات وهيبقى اقوى من الاول ومحدش هيعرف يخرج تانى
موضوع: رد: لا امان ولا سلام مع النظام 05/02/11, 01:18 am
اقتباس :
انتى برده مجاوبتيش ان لو حد من اهلك كان اتقتل ومات وهو مضروب بالرصاص ولا مضروب بشوم ولا دخلت فيه عربيه قتلته كان موقفك هيبقى ايه
كنت هغضب واتضايق وعايزة انتقم من اللى عمله كده وغضبى وانتقامى ده هو اللى هيحركنى بس لما اشوف وزير الداخلية بيتعاقب والرئيس هيمشى بعد كام شهر والشرطة مات منها 700 واحدة يبقى كده خلاص اهدى بقى واستنى ولو مااتعاقبش اللى اتسبب فى ده اثور تانى
اقتباس :
النظام لو شد حيله واتصلح هيلم كل الناس الى خرجت وهيرميهم فى المعتقلات وهيبقى اقوى من الاول ومحدش هيعرف يخرج تانى
مستحيل ان ده يحصل لان خلاص مابقاش حد خايف نائب رئيس الجمهورية نفسه وعدهم بكده ومستحيل هيرجع فى كلامه
انت دلوقتى قلت ان الرئيس لازم يتنحى طب ماهو كده كده ماشى بس بقى يكون حصل انتقال امن للسلطة ايه المشكلة لو استنيا لو ماحصلش حاجة نرجع تانى التحرير هو مش هيطير ماهو متلقح فى مكانه ايه السبب فى التعنت الفظيع ده مننا
موضوع: رد: لا امان ولا سلام مع النظام 05/02/11, 01:22 am
اقتباس :
الشباب الى انتى بتقولى جايبنهم الله اعلم هما منين وبيقولوا كده ليه يمكن بيقولوا كده علشان الناس الى زيك يقولوا زى مانتى بتقولى انا قولت انى مش بتفق معاهم لو دى مطالبهم ووضحت انا مع مين
اليومين الجايين هياكدولك كلامى ياحسام وبعدين لسه النائب هيجتمع مع لجنة الحكماء دى بكرة تقريبا لما نشوف وصلوا لايه وعلى فكرة اللجنة دى راحت الميدان وقعدت تقنعهم بالكلام اللى انت قلته ومارضيوش ابدا بكلامهم يعنى حتى الكلام ده رافضينه يعنى من الاخر مش عايزين اى حوار او تفاهم
موضوع: رد: لا امان ولا سلام مع النظام 05/02/11, 02:14 am
فعلا الايام الى جايه هتأكد حجات كتير حتى حوار 700 ظابط ده الى لو اى حد فكر تفكير بسيط هيعرف انه اشتغاله كبير يبرروا بيها مواقف الشرطه الامم المتحده قالت ان الى ماتوا من الشعب كانوا 500 دول الناس الى اتضرب عليهم رصاص وقنابل ودخلت فيهم عربيات و و و الخ.. يبقى الى ماتوا من الشرطه 700 لا فعلا حاجه معقوله عموما الايام هتكشف الاحداث والمستور هيبان وربنا مش هيسيب ظالم الا ما يعاقبه طول ماحنا مش قادرين عليه ربنا ينتقم منه وحسبى الله ونعم الوكيل
{.... ÊfiÌ⁄ ابن الاسلام ....}
{..دموع تائبة..}
قلم مشارك
عضو منذ : 03/02/2011
عدد المساهمات : 58
نقاط النشاط : 73
العمر : 35
اعيش فى : بلـــ مصر ـــلد
بشتغل : لا أعمل خريجة
التقييم : 2
موضوع: رد: لا امان ولا سلام مع النظام 05/02/11, 07:57 am
السلام عليكم ورحمة الله وبركاته
احياكم ع الطرح الرائع الذى لمس الحرج حقا
اقتباس :
الناس دى خرجت علشان مين وعلشان ايه!!!
كلهم خرجوا علشانا ولو كل واحد فيهم قال المهم نفسى مش هيتحرك من مكانه
دى معاكم حق فى سردها
ممتازة جدا عشرة ع عشرة
اقتباس :
الامن والامان فى اسقاط النظام
فات وقت التراجع وانتهى وقت الوعود الباطله والكاذبه
موضوع: رد: لا امان ولا سلام مع النظام 05/02/11, 10:49 am
انا مستغربه جدا من كلامك ياشجن انت مصدقه بجد انه هيصلح ولا هيعمل حاجه مهو ماسك بقاله 30 سنه معملش ليه من ساعتها ولاهو الى معرفش يعمله فى30سنه هيعمله فى 6شهور انا كنت فعلا متعاطفه معاه جدا بعض الخطاب بس انت اكيد شفتى الى حصل بعدها فى ميدان التحرير واعتداء البلطجيه على الناس الى هناك ولو سمعتى هتعرفى ان دول بتوع الحزب الوطنى واعضاء مجلس الشعب ودا اول بس ما حسوا انه مش هيمشى الموضوع مش اننا نستنى لما مدته تخلص دا وراه نظام فاشل كله وحسنى طول عمره خارب البلد هو وبتوع الحزب
اقتباس :
وعلى فكرة اللجنة دى راحت الميدان وقعدت تقنعهم بالكلام اللى انت قلته ومارضيوش ابدا بكلامهم يعنى حتى الكلام ده رافضينه يعنى من الاخر مش عايزين اى حوار او تفاهم
لانهم مش عاوزين يتكلمو مع حد الى لما هو يمشى وهو لو كان بيخاف بجد على مصلحه البلد كان مشى من الاول حقنت للدماء على فكره قنوات التليفزيون المصري بتجيب حاجات غريبه معضمها كدب
03/02/11, 11:23 pm
